அசோசியேட் பிரஸ்
செய்தி நிறுவனத்தின் புகைப்பட செய்தியாளர்கள் தார் யாசின், முக்தார் கான், சன்னி ஆனந்த்
ஆகிய மூவருக்கு காஷ்மீரில் நடந்த ஒடுக்குமுறை குறித்த புகைப்படங்களை எடுத்ததற்காக இந்த
ஆண்டின் புலிட்சர் விருது வழங்கப்பட்டுள்ளது.
புலிட்சர் விருது
என்பது பத்திரிக்கை, இலக்கியம் உள்ளிட்ட துறைகளில் முக்கியப் பங்காற்றி வருபவர்களுக்கு
அமெரிக்காவில் வழங்கப்படும் மிக உயரிய விருதாக இருக்கிறது. ஒவ்வொரு ஆண்டும் 21 பிரிவுகளின்
கீழ் கொலம்பியா பல்கலைக்கழகத்தில் இவ்விருதுகள் அறிவிக்கப்படும். இந்த முறை கொரோனா
தொற்றின் காரணமாக இணையதளத்தில் ஒரு காணொளி வழியாக இவ்விருதுகள் அறிவிக்கப்பட்டுள்ளன.
காஷ்மீரின் அடக்குமுறைகளுக்கு மத்தியில் நின்று அம்மக்களின் வலிகளை வெளிக்கொண்டு வந்ததற்காக
மூன்று புகைப்படவியலாளர்களுக்கும் இவ்விருது வழங்கப்பட்டுள்ளது.
காஷ்மீரின்
அவலத்தைப் பேசிய படங்கள்:
கடந்த 2019ம்
ஆண்டு ஆகஸ்ட் மாதத்தில் இந்தியாவின் பாஜக அரசாங்கம் இந்தியாவுடன் இணைந்த காலம் தொட்டு
காஷ்மீருக்கு இருந்து வந்த சிறப்பு தன்னாட்சி உரிமையான பிரிவு 370-ஐ துப்பாக்கி முனையில்
நீக்கியது. இதன் காரணமாக காஷ்மீரின் சுயாட்சி உரிமை பறிபோனதுடன், எவர் வேண்டுமானாலும்
காஷ்மீரில் நிலம் வாங்கலாம் என்றொரு நடைமுறையையும் வந்தது.
இது காஷ்மீர்
மக்கள் மத்தியில் கடுமையான கோபத்தினை ஏற்படுத்தியது. இந்திய அரசாங்கம் காஷ்மீர் மக்களின்
முக்கிய அரசியல் தலைவர்கள், முன்னாள் முதல்வர், செயல்பாட்டாளர்கள், பொதுமக்கள் என ஆயிரக்கணக்கானோரை
கைது செய்தது. தொலைக்காட்சி இணைப்புகள், தொலைபேசி சேவைகள், இணையதளம் என அனைத்தும் முடக்கப்பட்டன.
மாதக்கணக்கில் முழுமையான ஊரடங்கு அமல்படுத்தப்பட்டது. வீதிகள் முழுதும் அரசின் ஆயுதப்
படையினர் குவிக்கப்பட்டனர். ஊடகவியலாளர்கள் கூட பல்வேறு தடுப்புக் காவல் சட்டங்களில்
கைது செய்யப்படுகிறார்கள்.
ஆனாலும் காஷ்மீரிகள்
போராடித்தான் வருகின்றனர். இப்படிப்பட்ட சூழல்களுக்கு மத்தியில் பல கடினமான சவால்களை
எதிர்கொண்டு காஷ்மீரிகள் மீதான அடக்குமுறையையும், அவர்களின் போராட்டங்களையும் உயிர்ப்புத்
தன்மையுடன் புகைப்படங்களாக வெளிக்கொண்டு வந்தன இந்த மூன்று புகைப்படவியலாளர்களும்.
மேலும் கடந்த
2019 பிப்ரவரி மாதம் புல்வாமா தாக்குதல் நடைபெற்ற போதும் பல்வேறு பகுதிகளில் காஷ்மீர்
மக்கள் ஆயுதப்படையினரின் தாக்குதலால் பாதிக்கப்பட்டனர். அதனையும் இவர்கள் புகைப்படக்
கருவியின் வழியே பதிவாக்கியிருக்கிறார்கள்.
அவர்களின் புகைப்படங்கள்
ஒவ்வொன்றும் பல கதைகளை, வலிகளை மக்களிடம் உரையாடுகிறது. அடைக்கப்பட்ட சாலைகள், போராடும்
மக்கள், ஆயுதப் படைகள் இவற்றுக்கிடையில் மக்களின் வாழ்க்கை நிலை என அனைத்தையும் அப்புகைப்படங்கள்
பேசுகின்றன. பல ஆபத்தான நிலைகளில் மிகத் துணிவுடன் இப்புகைப்படங்களை எடுத்திருக்கிறார்கள்.
அவற்றில் முக்கியமான படங்களை இங்கே அளிக்கிறோம்.
1. வேலைநிறுத்தத்தின் போது மூடப்பட்ட கடை வீதியின் வாசலில் அமர்ந்திருக்கும் காஷ்மீர் முதியவர் – பிப்ரவரி 17, 2019 / தார் யாசின் 2. புல்வாமா தாக்குதலை நடத்தியவர்கள் மறைந்திருக்கக் கூடும் என்று சொல்லப்பட்டு தாக்குதலுக்கு உள்ளாக்கப்பட்ட தெற்கு ஸ்ரீநகரின் குடியிருப்புப் பகுதிகள் – ஃபிப்ரவரி 18, 2019 / தார் யாசின் 3. ஆயுதப் படையினரின் துப்பாக்கிச் சூடு தாக்குதலுக்கு பின் இடிந்து போன வீட்டின் பகுதியிலிருந்து பொருட்களை பிரித்தெடுக்கும் காஷ்மீரிகள் – மார்ச் 4 , 2019 / தார் யாசின் 4. இந்திய ஆயுதப் படையினரால் கொல்லப்பட்ட 11 வயது சிறுவன் ஆதிஃப் மிர்-ன் இறுதி நிகழ்வில் அழும் வடக்கு ஸ்ரீநகரின் ஹஜீன் கிராமத்து மக்கள் – மார்ச் 22, 2019 / தார் யாசின் 5. ஸ்ரீநகரில் நடைபெற்ற ஒரு போராட்டத்தில் கண்ணீர் புகை குண்டுகளையும், துப்பாக்கிச் சூட்டையும் நடத்தியதைக் கண்டித்து ஆயுதப் படையினரை எதிர்த்து முழக்கமிடும் பெண்கள்.- ஏப்ரல்9, 2019 / தார் யாசின் 6. ரம்ஜான் மாதத்தின் முதல் நாள் நோன்பின் போது குரான் வகுப்பில் காஷ்மீர் முஸ்லீம் குழந்தைகள் – மே 7, 2019 / முக்தார் கான் 7. தெற்கு ஸ்ரீநகரின் ட்ரால் பகுதியில் துப்பாக்கிச் சூட்டினால் பாதிப்புக்கான வீட்டின் சுவரிலிருந்து குண்டினை வெளியில் எடுக்க முயலும் இளைஞர் – மே24, 2019 / தார் யாசின் 8. ஆயுத வாகனத்தின் முன்பு கல்லெறியும் காஷ்மீரி போராட்டக்காரர் – மே 31, 2019 / தார் யாசின் 9. ஊரடங்கின் போது முள்வேலியின் பின்புறமிருந்து எடுக்கப்பட்ட புகைப்படம் – ஆகஸ்ட் 6, 2019 / தார் யாசின் ஸ்ரீநகரில் வீட்டு வாசலில் நின்று கொண்டிருந்த போது, இந்திய ஆயுதப் படையினரால் வலது கண்ணில் மார்பில் பந்து ஷாட்-க்கு உள்ளான 6 வயது சிறுமி முனிஃபா நசீர் – ஆகஸ்ட் 12, 2019 / முக்தார் கான் 11. தொலைநோக்கி வழியாக பார்வையிடும் எல்லைப் பாதுகாப்பு படை வீரர் – ஆகஸ்ட் 13, 2019 / சன்னி ஆனந்த் 12. ஸ்ரீநகரில் ஊரடங்கின் போது அங்குள்ள உள்ளூர் மசூதி ஒன்றின் வெளியே தெருவில் தொழுகை செய்யும் இசுலாமியர்களை பார்வையிடும் இந்திய ஆயுதப்படை வீரர் – ஆகஸ்ட் 16, 2019 / முக்தார் கான் 13. இந்திய அரசின் அதிகாரத்தினை எதிர்த்து விடுதலை முழக்கமிடும் காஷ்மீர் இளைஞர்கள் – ஆகஸ்ட் 23, 2019 / தார் யாசின் 14. ஸ்ரீநகரில் நபியின் பிறந்தநாள் நிகழ்வையொட்டி ஹஸ்ரத்பால் ஆலயத்தில் நபியின் நினைவுச் சின்னத்தை தலைமை மதகுரு காண்பிக்கும் போது பிரார்த்தனை செய்யும் காஷ்மீர் முஸ்லீம்கள். முகமதுவின் தாடியிலிருந்து ஒரு முடியைக் கொண்டிருப்பதாக கருதப்படும் ஹஸ்ரத்பாலில் ஆயிரக்கணக்கானோர் கூடினர். அவர்களுக்கு வெளியில் கண்காணிப்பிற்கு நிற்கும் ஆயுதப் படையினர். / முக்தார் கான் 15. மூன்று வயது குழந்தை பாலியல் வல்லுறவுக்கு உள்ளாக்கப்பட்டதைக் கண்டித்து ஸ்ரீநகரின் கல்லூரி மாணவர்கள் போராடிய போது ஆயுதப் படையினருடன் தகராறு ஏற்பட்டதால், கல்லூரிக்கு வெளியில் நிறுத்தப்பட்டிருந்த இருசக்கர வாகனங்களை உடைக்கும் ஆயுதப் படையினர். / தார் யாசின் 16. சூஃபி அறிஞர் ஷேக் சையது அப்துல் காதிர் ஜிலானி 11நாள் நினைவு நிகழ்வில் நூற்றுக்கணக்கில் கூடி வணங்கும் காஷ்மீர் மக்கள் டிசம்ப்ர் 9, 2019 / முக்தார் கான் 17. தால் ஏரியின் பனிப்படர்ந்த நடை பாலத்தில் நடந்து செல்லும் காஷ்மீரி – டிசம்பர் 13, 2019 / தார் யாசின்
